वीरेन्द्रनगर । आख्यानकार नयनराज पाण्डेद्वारा लिखित कथा कृति ‘जियरा’ लाई ५० हजार नगदसहितको ‘कर्णाली साहित्य समाज कृति पुरस्कार, २०७७’ प्रदान गरिएको छ।
कर्णाली साहित्य समाज सुर्खेतले शनिबार वीरेन्द्रनगरमा आयोजना गरेको कार्यक्रममार्फत उक्त कृतिलाई पुरस्कृत गरिएको हो।
आख्यानको नवीनतम् विषयवस्तु, शिल्प र शैलीको प्रयोगद्वारा तराई र मधेसका समाजमा विद्यमान कुप्रथा, रुढीवादी संस्कार र अन्धविश्वासमाथि निर्मम प्रहार गर्दै कथा कृति ‘जियरा’ ले आम नागरिकका दुःख, पीडा र भोगाइहरू उद्घाटन सफल भएकाले पुरस्कृत गरिएको समाजका अध्यक्ष खगेन्द्रप्रसाद अधिकारीले जानकारी दिए।
त्यस्तै साहित्य समाजद्वारा कर्णालीको लोकनृत्यलाई रंगमञ्चका माध्यमबाट राष्ट्रिय तथा अन्तर्राष्ट्रियस्तरमा चिनाउन योगदान दिएको भन्दै वरिष्ठ नृत्य निर्देशक कुलमान नेपालीलाई २५ हजार नगदसहितको ‘कर्णाली साहित्य समाज प्रतिभा पुरस्कार, २०७७’ प्रदान गरिएको छ।
इतिहासकार प्रा डा राजाराम सुवेदीलाई ‘कर्णाली साहित्य समाज साधना सम्मान, २०७७’ बाट सम्मान गरिएको छ। मध्यकालीन डोटी राज्य, २०५६, अछामको इतिहास, २०५६ जस्ता ऐतिहासिक महत्वका बहुमूल्य कृतिको सृजनाद्वारा कर्णाली प्रदेशको अभिलेखन गरी नेपालको इतिहासलाई समृद्ध बनाउन योगदान गरेको भन्दै समाजले प्रा डा सुवेदीलाई सम्मान गरिएको हो।
उक्त सम्मान तथा पुरस्कार अर्पण कार्यक्रममा बोल्दै प्रा डा सुवेदीले मुलुकभरि घुमे पनि सबै थोक कर्णालीमा पाइने गरेको बताए। इतिहास र भूगोलबीचको अकाट्य सम्बन्ध भएको बताउँदै उनले इतिहासलाई चट्टानको उपमा दिँदै यसले समाजलाई दिनैपरे सिलाजित उपलब्ध गराउने तर्क गरे।
वरिष्ठ नृत्य निर्देशक नेपालीले भन्ने राष्ट्रले दिन नसकेको सम्मान कर्णाली साहित्य समाजले प्रदान गरेर सांगीतिक जीवनलाई थप ऊर्जाशील बनाएको बताए।
समाजका संस्थापक तथा संरक्षक महेशविक्रम शाहले कर्णालीको इतिहास, कला, साहित्यको उत्खनन गर्न बाँकी रहेको जनाउँदै पुरस्कृत एवं सम्मानित व्यक्तित्वहरूलाई यहाँको कथा, इतिहास र संस्कृतिका क्षेत्रमा दरिलो कलम चलाउन आग्रह गरे। रासस
